Google сунъий интеллектга эга янги ақлли кўзойнакларини тақдим этди
Google компанияси яна ақлли кўзойнаклар бозорига қайтмоқда. Google И/О конференцияси доирасида технология гиганти Варбй Паркер ва Гентле Монстер брендлари билан ҳамкорликда сунъий интеллект имкониятларига эга янги кўзойнаклар туркумини ишлаб чиқаришини эълон қилди. Қурилмалар Samsung билан ҳамкорликда лойиҳалаштирилган бўлиб, Android ва iOS операцион тизимларида ишловчи смартфонлар билан тўлиқ мослашади. Бу ҳақда Techcrunch.com хабар беради.
Компания ушбу қурилмаларни “аудио кўзойнаклар” деб атамоқда. Фойдаланувчилар уларга овозли буйруқлар бериш орқали Google экотизимидаги иловалар ва хизматлар, жумладан Gemini ёрдамчиси билан мулоқот қилиши мумкин. Тақдимот давомида кўзойнак ёрдамида онлайн тарзда қаҳва буюртма қилиш жараёни намойиш этилди.
Google аввалроқ ҳам ақлли кўзойнаклар соҳасида тажрибалар ўтказган. Хусусан, кўпчиликка маълум бўлган Google Гласс лойиҳаси ўз вақтида катта шов-шувларга сабаб бўлган эди. Бироқ, ҳозирги кунда ақлли кўзойнаклар бозори сезиларли даражада ўзгарди ва Meta каби йирик компаниялар ҳамда кўплаб стартаплар ушбу йўналишга катта сармоя киритмоқда.
Янги қурилмалар жорий йилнинг охирига қадар сотувга чиқарилиши кутилмоқда. Google ушбу маҳсулот орқали кундалик ҳаётда сунъий интеллект билан ўзаро алоқани янада қулайлаштиришни мақсад қилган.
