Xiaomi ва Redmi смартфонлари учун HyperOS 3 янгиланиши чиқди
Xiaomi компанияси HyperOS 3 операцион тизими учун интерфейс хатоларини тузатиш, билдиришномалар билан боғлиқ муаммоларни бартараф этиш ва ўйин режимларининг барқарорлигини таъминлашга қаратилган муҳим янгиланишлар сериясини эълон қилди. Бу ҳақда Ixbt.com хабар беради.
Ушбу янгиланиш бир вақтнинг ўзида бир нечта қурилмалар линиясини, жумладан, флагман Xiaomi 17 серияси, Redmi К80 ва К90, Redmi Турбо 5 ҳамда бошқа моделларни қамраб олади. Аввалроқ фойдаланувчилар ҳолат сатридан тортиб, иловалардаги шрифтларгача бўлган интерфейс элементларининг нотўғри кўриниши бўйича шикоят қилишган эди.
Шунингдек, билдиришномалар етказилишидаги узилишлар ва Гаме Турбо функциясининг беқарор ишлаши каби ўйин сценарийларидаги хатолар қайд этилган. Эндиликда компания тизимнинг равонлиги ва барқарорлигини оширишга қаратилган комплекс тузатишлар тўпламини тақдим этди.
Хусусан, Xiaomi 17 Pro Max моделида тасвирларни тўлиқ экранда кўргандан сўнг ҳолат сатрининг йўқолиб қолиши муаммоси бартараф этилди. Xiaomi 15 Ultra қурилмасида СМС-билдиришномалар етказилиши яхшиланди, Redmi К90 сериясида эса иловаларнинг ишдан чиқиши ва визуал бузилишлар тузатилди.
Redmi Турбо 5 фойдаланувчилари учун иловаларнинг ўз-ўзидан ишга тушиши муаммоси ҳал қилинган бўлса, К80 линиясида ўйин режими созламалари барқарорлаштирилди. Ушбу янгиланишлар тизимнинг умумий самарадорлигини сезиларли даражада ошириши кутилмоқда.
