NASA 2027-йилдан бошлаб Ойга ҳар ой ракета учиришни режалаштирмоқда
АҚШ Миллий аэронавтика ва коинотни тадқиқ қилиш бошқармаси (NASA) Ер йўлдошига амалга ошириладиган космик парвозлар частотасини кескин оширишни ният қилган. Фох Невс телеканалига берган интервюсида идора вакили Жаред Исаакман маълум қилишича, 2027-йилдан бошлаб АҚШ Ойга деярли ҳар ойда учувчисиз космик аппаратларни жўнатишни режалаштирмоқда. Бу ҳақда Ixbt.com хабар беради.
Унинг сўзларига кўра, учувчисиз кемаларнинг илк синов парвозлари жорий йилдаёқ старт олиши мумкин. Ушбу мунтазам роботлаштирилган қўнишлардан кўзланган асосий мақсад — Ойнинг жанубий қутби ҳудудида жойлашадиган доимий Америка базасини қуриш учун муҳандислик-техник тайёргарлик кўриш ва инфратузилмани кенгайтиришдир.
Жаред Исаакман Ой юзасида инфратузилмани барпо этиш жараёнида ишлаб чиқиладиган ва синовдан ўтказиладиган технологиялар бутун бошқариладиган космонавтика келажаги учун ўта муҳим аҳамиятга эга эканини алоҳида таъкидлади. Автоматик қурилиш соҳасида орттирилган тажриба ва кўникмалар инсоният тарихидаги Марсга илк узоқ муддатли экспедицияни ташкил этиш учун пойдевор бўлади.
Артемис дастурининг учинчи босқичи жадвалига мувофиқ, америкалик астронавтларнинг Ойга қўниши 2028-йилда амалга оширилиши кутилмоқда. Қизил сайёрага илк бошқариладиган кемаларни жўнатиш эса тахминан 2030-йилларнинг ўрталарига режалаштирилган.
