Алексиа Путельяс Барселона жамоасини тарк этмоқда: Кейинги бекат Англия?
Икки карра "Олтин тўп" соҳибаси Алексиа Путельяс 14 йиллик тарихий фаолиятидан сўнг мавсум якунида Барселона клубини тарк этади. Афсонавий ярим ҳимоячининг кетиши ҳақидаги хабар унинг Англия аёллар Суперлигасига ўтиши борасидаги миш-мишларни янада авж олдирди. Каталония клуби ўзининг рамзий сардори ва барча даврлардаги энг яхши тўпурари билан ҳиссиётларга бой хайрлашув маросимини ўтказишга тайёрланмоқда. Бу ҳақда Goal.com хабар беради.
Барселона расмий сайти орқали 30 ёшли футболчининг жорий кампания якунида жамоа билан хайрлашишини тасдиқлади. Алексиа Путельяс учун махсус хайрлашув тадбири чоршанба куни Spotify Камп Ноу стадионида бўлиб ўтади. Клуб баёнотида таъкидланишича, Путельяс нафақат жамоа етакчиси, балки бутун дунёда аёллар футболининг ривожланишига улкан ҳисса қўшган глобал ўрнак тиmsолига айланди.
Путельяс 2012-йилда 18 ёшида Леванте жамоасидан келиб қўшилган эди. Ўтган давр мобайнида у "кўк-анорранглилар" либосида 507 та ўйинда майдонга тушиб, клуб тарихидаги энг кўп ўйин ўтказган иккинчи футболчига айланди. Шунингдек, у 232 та гол билан клуб тарихидаги энг яхши тўпурар мақомини сақлаб турибди. Унинг сардорлиги остида Барселона мисли кўрилмаган 38 та совринга, жумладан 4 бор Чемпионлар лигаси ғолиблигига эга чиқди.
Индивидуал даражада ҳам Алексиа Путельяс аёллар футболи стандартларини янги босқичга олиб чиқди. У 2021 ва 2022-йилларда кетма-кет "Олтин тўп"ни қўлга киритган илк Барселона вакиласи бўлди. Шунингдек, у FIFA Те Бест ва UEFA талқинига кўра йилнинг энг яхши футболчиси унвонларини ҳам қўлга киритган. Испания терма жамоаси сафида эса у Жаҳон чемпиони ва Миллатлар лигаси ғолибига айланди.
Клуб баёнотида футболчининг иродаси ва оғир жароҳатлардан сўнг катта қийинчилик билан сафга қайтгани алоҳида эътироф этилди. Эндиликда эркин агентга айланадиган Путельясга Англиянинг бир қатор гранд клублари қизиқиш билдирмоқда. Унинг кейинги манзили ВСЛ (Аёллар Суперлигаси) бўлиши кутилмоқда.
