Namangan va Farg‘onada aholiga ajratilgan ko‘mirni talon-toroj qilganlar ushlandi

Bosh prokuratura tomonidan energetika sohasida qonun buzilishi holatlariga nisbatan keng qamrovli tadbirlar o‘tkazilmoqda.

Xususan, Uchqo‘rg‘on tumani ko‘mir ombori mudiri U. N. kuz-qish mavsumida aholiga imtiyozli narxda tarqatishga mo‘ljallangan 623,7 tonna ko‘mirlarni talon-toroj qilganligi aniqlangan.

Shuningdek, Buvayda tumani ko‘mir ombori mudiri A.I. kuz-qish mavsumida aholiga imtiyozli narxda tarqatishga mo‘ljallangan 413,8 mln. so‘mlik 1.364,3 tonna ko‘mirlarni go‘yoki fuqarolar olganligi to‘g‘risida soxta ma’lumotlar tayyorlab, ko‘mirni naqd pulga sotib, shaxsiy manfaatlari yo‘lida talon-toroj qilgan.

Ikkala holat bo‘yicha ham ombor mudirlariga nisbatan jinoyat ishi qo‘zg‘atilib, ular protsessual tartibda ushlangan.