Surxondaryoda Damas skuter bilan to‘qnashdi — 17 yoshli yigit vafot etdi

Surxondaryo viloyati Termiz shahrida 11-sinf o‘quvchisi yo‘l-transport hodisasi oqibatida halok bo‘ldi, deb gazeta.uz xabar berdi.

Ma’lum qilinishicha, hodisa 2025-yil 6-iyun kuni soat 01:30 lar atrofida Bog‘ishamol mahallasi hududida sodir bo‘lgan. Damas haydovchisi chorrahada chapga burilmoqchi bo‘lgan va qarama-qarshi tomondan harakatlanib kelayotgan skuter bilan to‘qnashgan. Skuterni 17 yoshli yigit — 11-sinf o‘quvchisi boshqargan.

To‘qnashuv oqibatida yigit son suyagi sinishi, bosh miya yopiq jarohatlari va boshqa tan jarohatlari bilan shifoxonaga yetkazilgan, biroq ko‘rsatilgan tibbiy yordamga qaramay vafot etgan.

Yo‘l-transport hodisasidan so‘ng Damas avtomobili tegishli bo‘lgan korxonada tushuntirish ishlari olib borilgan.