Barselona ketma-ket 33 o'yinda gol urmoqda

Kataloniyaning "Barselona" klubi "Kamp Nou" stadioniga qaytib, Bilbao "Atletik" jamoasini toʻrt javobsiz gol bilan magʻlub etdi. Bu "Barselona" uchun Ispaniya La Ligasidagi ketma-ket 33-oʻyin boʻlib, unda jamoa kamida bitta gol urishga muvaffaq boʻldi.

"Barselona" soʻnggi marta 2024-yilning 15-dekabrida La Liga doirasida "Leganes"ga qarshi oʻyinda gol ura olmagan edi. Oʻsha uchrashuvda jamoa oʻz maydonida minimal hisobda magʻlub boʻlgandi.

Ushbu ketma-ketlik "Barselona" uchun 2019-yildan beri eng yaxshi natija hisoblanadi. Oʻsha davrda jamoani Ernesto Valverde boshqargan va klub ketma-ket 37 oʻyinda gol urgan edi.

Keyingi turda "Barselona" yana oʻz maydonida oʻynaydi va bu safar "Alaves" klubiga qarshi bahs olib boradi.