Jonathan Ta yetakchilik maydonda namuna bo‘lishdan boshlanishini aytdi

Myunxenning «Bavariya» klubi himoyachisi Jonathan Ta jamoada yetakchi bo‘lish nimani anglatishi haqida fikr bildirdi. Bu haqda euro-football.ru xabar beradi.

Futbolchining ta’kidlashicha, haqiqiy liderlik baland ovozda buyruq berish yoki kimnidir koyish emas, avvalo shaxsiy namuna ko‘rsatishdan boshlanadi. Uning aytishicha, u maydonda o‘z vazifasini sifatli bajarishga intiladi, markaziy himoyadagi sheriklariga yo‘l-yo‘riq ko‘rsatadi, keyin bu yordam qanot himoyachilariga va oxir-oqibat butun jamoaga ta’sir qiladi. Ta uchun eng muhimi — konstruktiv bo‘lish, deya uning so‘zlarini Germaniyaning Sky nashri keltirdi.

Ma’lumot uchun, Jonathan Ta «Bavariya» safida jami 34 uchrashuvda maydonga tushib, 3 ta gol urdi va 3 ta golli pas muallifi bo‘ldi.