Krishtianu Ronaldu jarohat oldi, u qachon safga qaytishi mumkin (foto, video)

Portugaliya terma jamoasi hujumchisi Krishtianu Ronaldu Yevro-2020 saralashi doirasidagi Serbiyaga qarshi oʻyinda (1:1) jarohat oldi.

34 yoshli hujumchi birinchi boʻlim oʻrtalarida oʻziga uzoqdan uzatilgan toʻpga yugurib borayotib, birdan tezligini pasaytirishga majbur boʻldi; soʻng zaxira oʻrindigʻi tomonga murojaat qilib, oʻzini almashtirishlarini soʻradi. Maʼlum boʻlishicha, u belining oʻng qismidan shikastlangan.

Cristiano Ronaldo being subbed for muscular injury! pic.twitter.com/26MZ10cLem

— Tancredi Palmeri (@tancredipalmeri) March 25, 2019

“Xavotir olayotganim yoʻq, oʻz tanamni bilaman. Bir yoki ikki haftada safga qaytsam kerak”, – degan Ronaldudan iqtibos keltirmoqda portugal matbuoti.

Lissabondagi bahsning 31-daqiqasidan boshlab Krishtianuning oʻrnida yarimhimoyachi Pissi oʻyinni davom ettirdi. Bu vaqtda hisob mehmonlar foydasiga 0:1 boʻlib turgandi. Boʻlim oxirlarida Danilo Pereyra muvozanatni tikladi. Ikkinchi boʻlimda jamoalar boshqa gol urishmadi, natijada Portugaliya milliy jamoasi Yevro-2020 saralashini ketma-ket ikkita durang bilan boshladi. Fernandu Santush jamoasi ilk turda ham oʻz uyida Ukrainani magʻlub eta olmagandi (0:0).

Ukraina va Serbiyaga qarshi bahslar Krishtianu Ronaldu uchun Portugaliya milliy jamoasi safidagi JCH-2018dan keyingi ilk oʻyinlar boʻldi.

Maʼlumot uchun, “Yuventus” A Seriyaning navbatdagi turlarini “Empoli”, “Kalyari” va “Milan”ga qarshi oʻtkazadi. 10 aprel kuni turinliklar YECHLning 1/8 finalining “Ayaks”ga qarshi dastlabki oʻyinini Amsterdamda oʻtkazadi.

Eslatib oʻtamiz, avvalroq Argentina milliy jamoasi sardori Lionel Messi ham jarohat olib, terma lagerini tark etgandi.