Xiaomi hamyonbop Poco Pad C1 planshetini taqdim etdi: 2K ekran va 120 Hz
Xiaomi kompaniyasi Poco brendi ostida yangi hamyonbop planshetini namoyish etdi. Poco Pad C1 deb nomlangan ushbu qurilma kompaniyaning rasmiy global saytida paydo boʻldi va u xalqaro bozor uchun moʻljallangan. Bu haqda Ixbt.com xabar beradi.
Planshet 9,7 dyuymli, 2K (2048 x 1280 piksel) aniqlikdagi IPS-displey bilan jihozlangan boʻlib, tasvir yangilanish chastotasi 120 Hz ni tashkil etadi. Poco Pad C1 metall korpusga ega, uning qalinligi 7,4 mm, vazni esa taxminan 406 grammga teng. Qurilma kundalik media-kontent isteʼmoli va oʻqish uchun yetarlicha ixcham qilib ishlangan.
Qurilmaning unumdorligi uchun Qualcomm Snapdragon 6s 4G Gen 2 chipi javob beradi. U 6 GB gacha tezkor xotira va 128 GB gacha doimiy xotira bilan taʼminlangan. Shuningdek, microSD kartalari yordamida xotirani 2 TB gacha kengaytirish imkoniyati mavjud.
Planshet 4G tarmogʻini qoʻllab-quvvatlaydi, ikkita dinamik va 3,5 mm quloqchin uyasi bilan jihozlangan. Akkumulyator sigʻimi 7600 mAs boʻlib, 18 W quvvatlanish texnologiyasiga ega. Kameralar borasida 8 MP asosiy va 5 MP old kamera oʻrnatilgan.
Dasturiy taʼminot sifatida HyperOS 3 tizimi tanlangan. Poco Pad C1 koʻk va kulrang ranglarda sotuvga chiqadi. Narxlarga kelsak, 4/64 GB versiyasi ilk xaridorlar uchun 140 dollar, 6/128 GB talqini esa 180 dollar etib belgilangan.
