Elon Musk SpaceXAI uchun hatto sunʼiy intellektda tajribasi yoʻqlarni ham ishga chaqirmoqda
Milliarder Elon Musk oʻzining SpaceXAI loyihasi uchun muhandis va fiziklar qabul qilinishini eʼlon qildi. Uning soʻzlariga koʻra, kompaniya "jahon darajasidagi mutaxassislarni" qidirmoqda, bunda sunʼiy intellekt (AI) sohasida tajribaning yoʻqligi ishga joylashish uchun toʻsiq boʻlmaydi. Bu haqda Ixbt.com xabar beradi.
Muskning taʼkidlashicha, aqlli mutaxassislar yangi sohalarni tezda oʻzlashtirib olishadi. Shu sababli, asosiy mezon — favqulodda qobiliyatlar va kuchli muhandislik bazasining mavjudligidir. "Aqlli odamlar hamma narsani tezda tushunib olishadi", — deya qoʻshimcha qildi u.
Nomzodlar oʻzlarining istisno darajadagi qobiliyatlarini namoyish etuvchi taxminan uchta banddan iborat maʼlumotni ai_eng@spacex.com elektron manziliga yuborishlari lozim. Elon Musk dastlabki tekshiruvdan oʻtgan saralangan xatlarni shaxsan oʻzi oʻqib chiqishini maʼlum qildi.
Avvalroq Elon Musk xAI va SpaceX kompaniyalari toʻliq birlashishini eʼlon qilgan edi. xAI alohida tuzilma sifatida faoliyatini toʻxtatadi va SpaceX tarkibidagi SpaceXAI deb nomlangan yangi boʻlinmaga aylanadi.
