Flipper xakerlar va ishqibozlar uchun Linux tizimli yangi gadjetni taqdim etdi
Flipper Zero xakerlik qurilmasi bilan tanilgan Flipper Devices kompaniyasi Flipper One deb nomlangan yangi gadjetni eʻlon qildi. Ushbu qurilma keng tarmoq ulanish imkoniyatlariga ega boʻlib, toʻlaqonli Linux shaxsiy kompyuteri vazifasini oʻtay oladi. Kompaniya hozirga qadar bir milliondan ortiq Flipper Zero sotgan boʻlsa-da, yangi model uning bevosita davomchisi emas, balki butunlay boshqa texnologik qatlamda ishlovchi qurilmadir. Bu haqda Techcrunch.com xabar beradi.
Flipper One qurilmasi 2 ta Gigabit Ethernet porti, 5 Gbps tezlikdagi USB Ethernet va Wi-Fi 6E (2.4/5/6 GHz) bilan jihozlangan. Shuningdek, unda M.2 porti mavjud boʻlib, u orqali 5G modemlar, SDR modullari, AI akseleratorlari yoki NVMe SSD xotira qurilmalarini ulash mumkin. Qurilma ayni damda ishlab chiqilish bosqichida boʻlib, u 8 GB operativ xotira va ikkita protsessor bilan ishlaydi.
Asosiy sakkiz yadroli RK3576 chipi ochiq Linux tizimini boshqaradi va mahalliy AI modellarini ishga tushirish uchun NPU blokiga ega. Ikkinchi chip esa ikki yadroli Raspberry Pi RP2350 mikrokontrolleri boʻlib, u displey, tugmalar va quvvat tizimini nazorat qiladi. Bu Linux qismi oʻchiq boʻlganda ham qurilmadan foydalanish imkonini beradi. Kompaniya Collabora bilan hamkorlikda ushbu chip drayverlarini asosiy Linux Kernel tarkibiga kiritish ustida ishlamoqda.
Kompaniya rahbari Pavel Zhovnerning soʻzlariga koʻra, ular Flipper OS deb nomlangan maxsus operatsion tizimni ham yaratmoqdalar. Bu tizim foydalanuvchilarga turli konfiguratsiyalar va paketlar oʻrnatilgan profillar oʻrtasida tez almashish imkonini beradi. Bu esa SD-kartani qayta formatlamasdan turib, tizimni toza holatga qaytarishni osonlashtiradi.
Flipper One qurilmasini router, VPN shlyuzi yoki HDMI 2.1 porti orqali 4K formatdagi media-boks sifatida ishlatish mumkin. Shuningdek, foydalanuvchilar internetga ulanmasdan turib, qurilma ichidagi mahalliy AI modellaridan maslahatlar olishlari va konfiguratsiyalar yaratishlari mumkin boʻladi. Hozirda loyihaning dasturiy taʻminot qismi, jumladan FlipperOS va FlipperCTL interfeysi konsepsiya bosqichida turibdi.
