Spotify ElevenLabs texnologiyasi asosida audiokitoblar yaratish vositasini chiqardi
Spotify kompaniyasi oʻzining Spotify for Authors platformasi doirasida ElevenLabs sunʼiy intellekt texnologiyasiga asoslangan audiokitoblarni nashr etish vositasini taqdim etdi. Investorlar kunida eʼlon qilingan ushbu yangi funksiya iyun oyida beta-versiyada, faqat taklifnoma asosida va dastlab faqat ingliz tilida ishga tushiriladi. Mazkur vosita mualliflarni eksklyuziv shartnomalar bilan bogʻlab qoʻymaydi, yaʼni yaratilgan audiokitoblarni boshqa platformalarda ham erkin tarqatish mumkin. Bu haqda Techcrunch.com xabar beradi.
Ushbu yangilik Spotify va ElevenLabs oʻrtasidagi hamkorlikning mantiqiy davomi boʻlib, ilgari mualliflar ushbu startap platformasida yaratilgan kontentni Spotifyʻga yuklash imkoniga ega edi. Garchi kompaniya Google Play Books bilan raqamli ovozlashtirish boʻyicha hamkorlik qilib kelayotgan boʻlsa-da, ElevenLabs taqdim etayotgan yanada tabiiy va ifodali ovoz modellari mualliflar uchun jozibadorroq boʻlishi kutilmoqda.
Spotify for Authors platformasi endilikda yana 10 ta tilni, jumladan, fransuz, nemis, golland, ispan va skandinaviya tillarini qoʻllab-quvvatlay boshlaydi. Shuningdek, kompaniya Audiobook+ tarif rejalarini kengaytirib, tinglash limitlarini oshirishni hamda kelajakda talabalar va oilalar uchun maxsus obuna turlarini joriy qilishni rejalashtirmoqda. Hozirgi kunda platformada bir milliondan ortiq Audiobook+ obunachilari mavjud.
Kompaniya audiokitoblarni qidirish jarayonini osonlashtirish uchun tabiiy tildagi soʻrovlar (prompt) orqali pleylistlar yaratish funksiyasini ham joriy etmoqda. Soʻnggi yillarda Spotify oʻzining audiokitoblar katalogini 700 000 taga yetkazdi va xalqaro bozorlarga faol kirib bordi. Natijada, platformada audiokitob tinglash soatlari oʻtgan yilga nisbatan 60 foizga oʻsganligi qayd etildi.
