Sunʼiy intellekt tugmasi va 6000 mAs akkumulyator: Infinix Hot 70 taqdim etildi
Infinix kompaniyasi oʻtgan yilgi Hot 60 modelining davomchisi boʻlgan yangi Hot 70 smartfonini rasman namoyish etdi. Yangi qurilma oʻz mobil texnikasini nafaqat unumdorlik vositasi, balki oʻzini namoyon qilish usuli deb biladigan foydalanuvchilar uchun moʻljallangan. Smartfon 12 xil rang variantida taklif etiladi, ular orasida atrof-muhit haroratiga qarab rangini oʻzgartiruvchi Thermo Orange qoplamasi alohida ajralib turadi. Bu haqda Ixbt.com xabar beradi.
Qurilma 6,78 dyuymli IPS-displey bilan jihozlangan boʻlib, u 120 Gs yangilanish chastotasi, HD+ (720 x 1576 piksel) aniqlik va 700 nitgacha yorqinlikni qoʻllab-quvvatlaydi. Smartfonning ichki qismidan MediaTek Helio G100 Ultimate protsessori, 8 GB gacha tezkor xotira va 256 GB gacha doimiy xotira joy olgan. Shuningdek, u 45 W tezkor va 10 W teskari quvvatlash imkoniyatiga ega 6000 mAs sigʻimli akkumulyator bilan taʼminlangan.
Infinix Hot 70 modelining oʻziga xos jihati — korpusda barmoq yetadigan masofada joylashgan maxsus One-Tap AI Button tugmasidir. Ushbu jismoniy tugma yordamida sunʼiy intellekt funksiyalariga bir zumda kirish mumkin. Qurilma IP65 standarti boʻyicha chang va suv sachrashidan himoyalangan boʻlib, XOS 16 (Android 16) platformasida ishlaydi.
Kompaniya ushbu model uchun Android operatsion tizimining 3 ta yirik yangilanishini va 5 yil davomida xavfsizlik tizimi yangilanishlarini taqdim etishni vaʼda qilmoqda. Smartfonning 4/128 GB xotiraga ega boshlangʻich versiyasi narxi 124 AQSH dollaridan boshlanadi. Suratga olish uchun 50 MP asosiy va 8 MP old kamera masʼuldir.
