Anker kompaniyasi eng xavfsiz Nano Power Bank tashqi akkumulyatorini taqdim etdi
Anker kompaniyasi Yaponiyada oʻzining yangi Nano Power Bank (model raqami A1113) portativ akkumulyatorini namoyish etdi. Qurilmaning asosiy texnologik oʻziga xosligi unda neo-litiy-ion (neo-lithium-ion) batareyasidan foydalanilganidir. Ishlab chiqaruvchining taʼkidlashicha, ushbu model hozirgi kunda brendning barcha mahsulotlari orasida eng xavfsiz quvvat manbai hisoblanadi. Bu haqda Ixbt.com xabar beradi.
Yangi materiallar qoʻllanilishi evaziga akkumulyator ekstremal tashqi bosimga chidamlilik, olovga bardoshlilik hamda jismoniy teshilish va shikastlanishlardan yuqori darajadagi himoyaga ega boʻldi. Anker Nano Power Bank (MagGo, Plus) bir vaqtning oʻzida ikkita qurilmani quvvatlantirishga moʻljallangan.
Qurilmaning bir tomonida 15 W quvvatga ega Qi2 simsiz quvvatlantirish maydonchasi joylashgan boʻlsa, ikkinchi qurilmani USB-C porti orqali ulash mumkin. Simli ulanishda quvvat ikki baravar yuqori — 30 W gacha yetadi. Ikkala kanaldan bir vaqtda foydalanilganda umumiy chiqish quvvati 17 Wni tashkil etadi (12 W USB-C portiga va 5 W simsiz gʻaltakka taqsimlanadi).
Oʻrnatilgan batareya sigʻimi 10 000 mA/soatni tashkil etadi, qurilma oʻlchamlari 104 x 71 x 15 mm, vazni esa 215 grammga teng. Hozirda Yaponiyada ushbu gadjetga 11 990 iyen (taxminan 75 dollar) narxida oldindan buyurtma berish mumkin. Anker yangi mahsulotning boshqa mamlakatlar bozoriga chiqish muddatlarini hozircha ochiqlamadi.
