Spotify podkastlardan parcha kesib olish funksiyasini ishga tushirdi
Spotify foydalanuvchilari uchun podkastlarning eng qiziqarli lahzalarini ulashish endi yanada osonlashdi. Chorshanba kunidan boshlab platformada yangi "Podcast clips" funksiyasi joriy etildi. Endilikda ilovaning "Hozir tinglanmoqda" (Now Playing) oynasida paydo boʻlgan qaychi belgisi yordamida tinglovchilar oʻzlariga yoqqan segmentni kesib olishlari va uni ijtimoiy tarmoqlar yoki messenjerlar orqali doʻstlari bilan boʻlishishlari mumkin. Bu haqda Techcrunch.com xabar beradi.
Foydalanuvchilar audio qismni kesib olayotganda, uni tahrirlash va ommaga ulashishdan oldin qayta tinglab koʻrish imkoniyatiga ega boʻladilar. Ulashish tugmasi bosilganda, tizim toʻliq epizodga havola, maʼlum bir bob yoki vaqt belgisi bilan bir qatorda, aynan oʻsha kesib olingan klipni yuborish variantini ham taklif etadi. Bu yangilik ayniqsa uzun intervyulardagi muhim iqtiboslarni tezkor tarqatishda qoʻl keladi.
Texnologiya sohasi vakillari uchun bu funksiya juda oʻrinli boʻldi. Hozirda yirik texnologik kompaniyalar va AI rahbarlari anʼanaviy OAV oʻrniga podkastlarda chiqish qilishni afzal koʻrishmoqda. Koʻplab muhim yangiliklar aynan podkastlarda eʼlon qilinayotgan bir paytda, yangi funksiya koʻp soatlik suhbatlarning eng asosiy qismlarini ajratib olishga yordam beradi.
Spotify maʼlumotlariga koʻra, joriy yil boshida joriy etilgan "Chapters" (Boblar) funksiyasi ham katta qiziqish uygʻotgan va har oyda 2 million martadan ortiq pleylistlarga qoʻshilmoqda. Saqlangan kliplar foydalanuvchining Spotify Library boʻlimida saqlanadi va ularni istalgan vaqtda qayta tinglash mumkin. Yangi funksiya butun dunyo boʻylab ham bepul, ham Premium foydalanuvchilar uchun mobil ilovada bosqichma-bosqich taqdim etilmoqda.
