Ehtiyojmand oilalarga isitish mavsumida 1 million so‘mdan beriladi

O‘zbekistonda isitish mavsumi boshlanishi bilan ijtimoiy himoyaga muhtoj oilalarga 1 million so‘mdan moddiy yordam ajratish jarayoni yo‘lga qo‘yildi.

Prezident qaroriga muvofiq, bu yil mamlakat bo‘ylab 1,1 milliondan ortiq oila qo‘llab-quvvatlov ro‘yxatiga kiritilgan. Ulardan 822 mingtasi ijtimoiy reyestrda, yana 290 mingdan ziyod oila “Mahalla yettiligi” tomonidan qo‘shimcha aniqlangan.

Qo‘shimcha yordam oladigan toifalar qatoriga quyidagilar kiradi:

• boquvchisini yo‘qotgan oilalar – 33,8 mingta;
• nogironligi bo‘lgan a’zosi borlar – 76,3 mingta;
• og‘ir kasal a’zosi yashaydiganlar – 23,7 mingta;
• yolg‘iz keksalar – 7 mingta;
• gaz tarmog‘iga ulanmaganlar – 2 mingta;
• bir xonadonda uch va undan ortiq oila yashaydiganlar – 26,2 mingta;
• boquvchisi mehnat migratsiyasida bo‘lganlar – 34,7 mingta;
• vaqtincha ishsizlar – 15,1 mingta;
• faqat pensiya hisobiga yashovchi oilalar – 69,7 mingta;
• yolg‘iz yashovchi fuqarolar – 2,3 mingta.

Mazkur tashabbus isitish mavsumida aholining ijtimoiy zaif qatlamlarini moliyaviy qiyinchiliklardan himoya qilishga qaratilgan.