Ekofaollar uchun 15 foizlik mukofot tizimi joriy etildi

Endilikda ekologik huquqbuzarliklarni fosh etgan fuqarolar moliyaviy rag‘batga ega bo‘ladi. Ekologiya va iqlim o‘zgarishi milliy qo‘mitasi tomonidan “Ekonazorat” tizimi va “@ecogovuzbot” orqali yuborilgan murojaatlarga asosan jarimaning 15 foizi muallifga mukofot sifatida beriladi.

Bu haqda qo‘mita raisi, Maxsus komissiya rahbari Aziz Abduhakimov ma’lum qildi. U fuqarolarni faollikka chorlab, har bir kamera ekologik himoyaning vositasiga aylanishi kerakligini ta’kidladi.

“Huquqbuzarlikni aniqlang va mukofotingizni oling. Tinch hayot va toza havo uchun kurashda birgamiz”, – dedi Abduhakimov o‘z murojaatida. Yangi tizim aholini ekologik muammolarga befarq bo‘lmaslikka undashi kutilmoqda.