Samarqand viloyatida birinchi qor yog‘di

Samarqand shahrida 18 oktyabr, yakshanba kuni qor yog‘di. Bu haqda Twitter foydalanuvchilariga asoslanib Daryo.uz xabar bermoqda.

«Birinchi qor bilan, Samarqand!», — deb yozadi foydalanuvchilardan biri. @Samarqandiy taxallusli foydalanuvchi esa «Samarqandda birinchi qor» deya xabar qoldirib, «birinchi qor bilan selfi»ga tushgan.

«Qarangki, shahar bayramida Samarqandda birinchi qor yog‘moqda. Yoqqanda ham ajoyib qor! Hammani bayram bilan!», — deb yozadi foydalanuvchi @Usmon_IX.

Ma’lumot uchun, 16—18 oktyabr kunlari O‘zbekistonda havo harorati sezilarli pasaydi, deyarli butun mamlakat bo‘ylab yog‘ingarchilik kuzatildi.

«O‘zgidromet» ma’lumotlariga ko‘ra, 19 oktyabr kuni O‘zbekistonning janubiy viloyatlari — Qashqadaryo va Surxondaryoda havo harorati +18 darajagacha, qolgan hududlarda, jumladan, Samarqand viloyatida +15 darajagacha iliq bo‘lishi kutilmoqda, faqat vodiyda (Andijon, Namangan, Farg‘ona) vaqti-vaqti bilan yomg‘ir yog‘ishi mumkin.