Sporting CP jamoasi sardori Morten Hjulmand oʻzining kelajagi borasidagi mish-mishlar kuchaygan bir paytda, Real Madrid bilan bogʻlanayotganini "katta sharaf" deb atadi. Daniyalik futbolchi Santiago Bernabeu stadionida amalga oshirilishi kutilayotgan tarkibni yangilash jarayonida Ispaniya gigantlarining asosiy nishoniga aylangan. Bu haqda Goal.com xabar beradi.
Hjulmand Portugaliya chempionatida ajoyib oʻyin koʻrsatmoqda va uning harakatlari yarim himoya chizigʻini kuchaytirmoqchi boʻlgan Real Madrid rahbariyatining eʻtiborini tortdi. 15 karra Yevropa chempionlari tomonidan qiziqish bildirilayotganiga munosabat bildirar ekan, futbolchi oʻz faxrini yashirmadi: "Ismimni Real Madrid kabi klub bilan bir qatorda koʻrish men uchun katta sharaf, ammo hozir Sporting aʻzosiman va bu klubni yaxshi koʻraman. Bor eʻtiborim ertangi oʻyinga qaratilgan".
26 yoshli futbolchiga boʻlgan qiziqish Jose Mourinho Madridga qaytishi mumkinligi haqidagi xabarlar bilan bir vaqtga toʻgʻri kelmoqda. Maʻlumotlarga koʻra, portugaliyalik mutaxassis agar jamoani qabul qilib olsa, Hjulmandni yarim himoya markazi uchun ideal nomzod deb hisoblaydi. Ushbu transfer Real Madrid uchun taxminan 50 million yevroga tushishi mumkin.
Sporting CP bosh murabbiyi Rui Borges ham vaziyatga munosabat bildirib, Hjulmandning iqtidori bunday qiziqishlarni keltirib chiqarishi tabiiy ekanini taʻkidladi. "Real Madrid kabi klublar u haqida gapirayotgani bizning ishimiz toʻgʻri yoʻlda ekanidan dalolat. Bu meni murabbiy sifatida xursand qiladi", — dedi Borges.
Hozirda Sporting CP mavsumdagi soʻnggi muhim bahsga — Torreense jamoasiga qarshi Taca de Portugal finaliga tayyorgarlik koʻrmoqda. Hjulmand transfer boʻyicha yakuniy qarorlar faqat mavsum toʻliq yakunlangach qabul qilinishini va hozirda asosiy maqsad sovrin yutish ekanini qoʻshimcha qildi.
“Zamin”ni Telegramʻda oʻqing!
