Markaziy Osiyo futbolchilari xalqaro maydonlarda tobora yorqinroq porlab, kuchli chempionatlarda o‘z so‘zini aytmoqda. Ayniqsa, so‘nggi davrda O‘zbekiston va Qozog‘iston terma jamoalari a’zolariga bo‘lgan qiziqish transfer bozorida sezilarli darajada kuchaydi. Bu esa mintaqamizda mahalliy futbol to‘g‘ri yo‘ldan ketayotgani va vakillarimizning jahon miqyosida raqobatbardoshligi oshayotganidan dalolat beradi.
Shu munosabat bilan Qozog‘istonning ommabop sportarena.kz sport portali nufuzli Transfermarkt tahliliy platformasi ma’lumotlariga tayanib, ayni paytda Markaziy Osiyoning eng qimmat 11 nafar futbolchisidan iborat ramziy terma jamoani tuzib chiqdi.
Top-11 talik: Millionlab yevrolik yulduzlar
Reytingning mutlaq yetakchisi sifatida yaqindagina grand klub safiga borib qo‘shilgan hamyurtimiz qayd etilgan. Ro‘yxatdan joy olgan eng qimmatbaho o‘yinchilar bilan tanishing:
Abduqodir Husanov (O‘zbekiston): “Manchester Siti” markaziy himoyachisi, 22 yosh — 35 million yevro;
Abbosbek Fayzullayev (O‘zbekiston): “Bashakshehir” yarim himoyachisi, 22 yosh — 7 million yevro;
Eldor Shomurodov (O‘zbekiston): “Bashakshehir” hujumchisi, 30 yosh — 7 million yevro;
Dastan Satpayev (Qozog‘iston): “Qayrat” hujumchisi (yozda “Chelsi”ga o‘tadi), 17 yosh — 3 million yevro;
Maksim Samorodov (Qozog‘iston): “Axmat” hujumchisi, 23 yosh — 2,5 million yevro;
Nurali Alip (Qozog‘iston): “Zenit” markaziy himoyachisi, 26 yosh — 2,5 million yevro;
Aziz G‘aniyev (O‘zbekiston): “Al-Batayeh” markaziy himoyachisi, 28 yosh — 2,2 million yevro;
Oston O‘runov (O‘zbekiston): “Persepolis” qanot hujumchisi, 25 yosh — 2 million yevro;
Rustam Yatimov (Tojikiston): “Rostov” darvozaboni, 27 yosh — 1,8 million yevro;
Otabek Shukurov (O‘zbekiston): “Bani Yas” yarim himoyachisi, 29 yosh — 1,6 million yevro;
Islom Chesnokov (Qozog‘iston): “Xarts” hujumchisi, 26 yosh — 1,2 million yevro.
Mamlakatlar kesimida statistika
Reytingda o‘zbekistonlik charm to‘p ustalari yaqqol ustunlikka ega bo‘lib turishibdi. Eng qimmat kuchli 11 talikdan O‘zbekistonning 6 nafar, Qozog‘istonning 4 nafar va Tojikistonning 1 nafar vakili joy oldi. Qayd etish lozimki, Qirg‘iziston va Turkmaniston terma jamoalari a’zolaridan hech kim bu safar mazkur nufuzli ro‘yxatga kira olmadi.
Vakillarimizning bunday yuqori baholanishi o‘zbek futbolining xalqaro maydondagi obro‘sini yanada yuksaltirishga xizmat qilishi shubhasiz.
Sizningcha, yaqin yillar ichida ro‘yxatdagi futbolchilarimizdan kimning transfer narxi yanada keskin ko‘tarilishi mumkin?
“Zamin”ni Telegramʻda oʻqing!
