Real Madrid yoshlar jamoasi murabbiyi Alvaro Arbeloa tajribali himoyachi Dani Carvajal haqida iliq fikrlar bildirib, uni klub tarixidagi eng muhim shaxslardan biri deb atadi. Arbeloa oʻzining soʻnggi matbuot anjumanida Carvajalning klub akademiyasidan asosiy tarkibgacha bosib oʻtgan yoʻli har bir yosh futbolchi uchun namuna ekanligini taʼkidladi. Bu haqda Goal.com xabar beradi.
"Dani Carvajal — Real Madrid futbolchisi qanday boʻlishi kerakligining ramzi. U oʻzimizning tarbiyalanuvchi, u poydevorning birinchi gʻishtini qoʻygan inson, bu esa uni maxsus va noyob qiladi. U barcha madridistlar uchun faxr manbaidir. Dani Atletik Bilbaoga qarshi oʻyinni asosiy tarkibda boshlaydi va uni almashtirganimda, butun stadion uni tik turib olqishlashiga aminman", — dedi Arbeloa.
Shuningdek, Alvaro Arbeloa oʻzining ham klubdagi faoliyati yakunlanayotganini tasdiqladi. U uzoq yillar davomida turli lavozimlarda xizmat qilgan Real Madrid jamoasi bilan xayrlashar ekan, bu butunlay ketish emas, balki vaqtinchalik tanaffus boʻlishiga umid bildirdi. Murabbiy Bilbaoga qarshi bahs uning uchun soʻnggi oʻyin boʻlishini maʼlum qildi.
Matbuotda Arbeloaning kelajagi va uning José Mourinho murabbiylik shtabiga qoʻshilishi borasidagi mish-mishlarga ham aniqlik kiritildi. Arbeloa bu ehtimollarni rad etib, Mourinhoning oʻz jamoasi borligini va u bilan ishlash imkoniyati nolga teng ekanligini aytdi. Dushanba kunidan boshlab u oʻz faoliyati uchun eng yaxshi yoʻlni tanlash haqida oʻylashini bildirdi.
“Zamin”ni Telegramʻda oʻqing!
