Madridning “Real” klubi bosh murabbiyligiga tayinlanishga yaqin turgan Joze Mourino yangi jamoasida himoya chizig‘ini kuchaytirishni rejalashtirmoqda. Portugaliyalik mutaxassisning e’tibori Dortmundning “Borussiya” klubi himoyachisi Niko Shlotterbekka qaratilgani aytilmoqda.
Bu haqda jurnalist Andres Martines ijtimoiy tarmoqda ma’lum qildi. Manbaga ko‘ra, Mourino germaniyalik himoyachini “Real” uchun munosib nomzodlardan biri sifatida ko‘rmoqda. Uning fikricha, Shlotterbek jismoniy kuch, havodagi kurash, to‘p bilan ishlash va himoyadagi qat’iyati orqali Madrid klubiga foyda keltirishi mumkin.
Qayd etilishicha, Joze Mourino 23 may kuni bo‘lib o‘tgan “Bavariya” va “Shtutgart” o‘rtasidagi Germaniya kubogi finaliga tashrif buyurgan. Ushbu safar faqat o‘yinni tomosha qilish bilan cheklanmagani aytilmoqda. Ma’lumotlarga ko‘ra, portugaliyalik murabbiy Germaniyaga tashrifi davomida Shlotterbek atrofidagi agentlar bilan ham uchrashgan va futbolchining “Real”ga ehtimoliy transferi bo‘yicha dastlabki muloqotlar o‘tkazgan.
Niko Shlotterbek 2022 yilda “Frayburg”dan “Borussiya” Dortmundga 20 million yevro evaziga ko‘chib o‘tgan edi. Dortmund klubida u tezda asosiy himoyachilardan biriga aylandi va barqaror o‘yini bilan Germaniya futbolidagi eng e’tiborli markaziy himoyachilar qatoriga kirdi.
Futbolchining “Borussiya” bilan amaldagi shartnomasi 2031 yil iyunigacha mo‘ljallangan. Bu esa transfer jarayoni oson kechmasligini anglatadi. Dortmund klubi uzoq muddatli shartnomaga ega futbolchisini arzonga qo‘yib yuborishi qiyin. Shuning uchun “Real” haqiqatan ham Shlotterbekni qo‘lga kiritmoqchi bo‘lsa, jiddiy moliyaviy taklif tayyorlashiga to‘g‘ri keladi.
Yakunlangan mavsumda Shlotterbek “asalarilar” safida 37 ta uchrashuvda maydonga tushdi. Ushbu bahslarda 5 ta gol urdi va 2 ta golli uzatma amalga oshirdi. Markaziy himoyachi uchun bunday statistika juda yaxshi ko‘rsatkich hisoblanadi. Bu uning nafaqat himoyada, balki standart vaziyatlar va hujumga qo‘shilishda ham xavfli futbolchi ekanini ko‘rsatadi.
Transfermarkt portali Niko Shlotterbekning bozor qiymatini 55 million yevro deb baholamoqda. Ammo amaldagi shartnomasi uzoq muddatli ekani hisobga olinsa, “Borussiya” uning uchun bundan ham yuqoriroq summa talab qilishi mumkin.
Mourino uchun kuchli markaziy himoyachi har doim muhim bo‘lgan. Portugaliyalik mutaxassis jamoalarini, odatda, mustahkam himoya, intizom va pozitsion tartib asosida qurishni yaxshi ko‘radi. Shu jihatdan Shlotterbek uning futbol qarashlariga mos keladigan nomzod sifatida ko‘rinmoqda.
Qisqasi, Joze Mourino “Real”ga qaytishi kutilar ekan, tarkibni kuchaytirish bo‘yicha rejalarni allaqachon boshlab yuborgandek. Niko Shlotterbek madridliklar himoyasi uchun jiddiy variant sifatida ko‘rilmoqda. Agar bu transfer amalga oshsa, “Real” markaziy himoyada yana bir kuchli va xarakterli futbolchiga ega bo‘ladi. Mourino kelsa, transfer bozori tinch turmasligi aniq — klassika.
“Zamin”ni Telegramʻda oʻqing!
