Венесуэланың бұрынғы президенті Николас Мадуро жұбайы Силия Флореспен бірге дүйсенбі күні Манхэттендегі федералдық сотқа жеткізілді. Бұл туралы Sky News хабарлады. Оларға АҚШ аумағына есірткі жеткізуге байланысты ауыр айыптар тағылған.
Алдын ала сот отырысында Николас Мадуро өзіне тағылған барлық айыптарды қатаң түрде жоққа шығарды. Оның жұбайы Силия Флорес те кінәсін мойындамайтынын мәлімдеді. Ерлі-зайыптылардың Бруклиндегі федералдық изолятордан күшейтілген күзетпен сот ғимаратына жеткізілгені, бұл тыңдау басталардан бірнеше сағат бұрын жүзеге асқаны хабарланды.
Істі қарау округтік судья Элвин Хеллерстайнға жүктелді. BBC мәліметінше, алғашқы сот отырысы негізінен процессуалдық сипатта болып, онда айыптау баптары ресми түрде оқылып жарияланған.
Тергеу нұсқасына сәйкес, Мадуро халықаралық наркокартельдермен байланыста болып, АҚШ-қа ірі көлемде кокаин жеткізу үдерістерін үйлестіруге қатысқан. Егер ол кінәлі деп танылса, оған өмір бойына бас бостандығынан айыру жазасы қолданылуы мүмкін.
Бұрынғы президенттің қорғаушылары оның қамауға алынуының заңдылығына күмән келтіруде. Олардың айтуынша, Мадуро егемен мемлекеттің басшысы ретінде халықаралық иммунитетке ие болған және бұл жайт сот процесінде бөлек ескерілуі тиіс.
Мәліметтерге қарағанда, Мадуро мен Флорес сенбіге қараған түні Каракаста АҚШ күштері жүргізген арнайы операция барысында ұсталған. Одан кейін олар арнайы рейспен Нью-Йоркке жеткізілген. ФБР ұшағы Нью-Йорк штатындағы Ұлттық гвардия базасына қонып, кейін жұп конвоймен алдымен есірткіге қарсы мекемеге, содан соң Бруклиндегі федералдық изоляторға орналастырылған.
Бұл оқиға халықаралық саяси аренада үлкен резонанс тудырды және алдағы күндері осы іс төңірегіндегі талқылаулардың күшеюі күтіледі.
