Өзбекстанда ірі халықаралық ойын-сауық жобасы — Disneyland тақырыбындағы саябақты салу жоспарлары талқылануда. Бұл бастама елдің туризм әлеуетін арттыру, өңірді жаңа деңгейдегі демалыс орнына айналдыру мақсатын көздейді. Жоба жүзеге асса, ол тек жергілікті тұрғындар үшін ғана емес, сонымен қатар шетелдік туристер үшін де тартымды орынға айналуы мүмкін.
Аталған мәселе Президент Әкімшілігі басшысы Саида Мирзиёева мен The Walt Disney компаниясының вице-президенті Хайма Вашингтон арасында өткен кездесуде жан-жақты талқыланды. Тараптар Өзбекстанда Disney концепциясына сәйкес мәдени және туризм инфрақұрылымын дамыту мүмкіндіктерін қарастырды.
Сонымен бірге, елде халықаралық компаниялар үшін қолайлы жағдайлар жасалған "Cinema Park" креатив саябағын құру жоспары да ұсынылды. Бұл алаң кино, анимация және цифрлық контент салаларында жұмыс істейтін шығармашылық мамандар үшін заманауи платформаға айналуы мүмкін.
Кездесуде Голливуд мамандарымен ынтымақтастықта жаңа буын аниматорлар, режиссерлер және сценарийшілерді даярлау мәселесіне ерекше назар аударылды. Бұл қадам жергілікті кино және анимация өнеркәсібін жаһандық нарыққа шығару үшін маңызды негіз бола алады.
Сонымен қатар, Өзбекстанда Disney-дің Орталық Азия бойынша өкілдігін ашу, сондай-ақ, өзбек тілінде балаларға арналған контент көрсететін телеарна іске қосу мәселелері де талқыланды. Қорыта айтқанда, Disney-ге қатысты жоспарлар ауқымды — егер бұл идеялар жүзеге асса, бұл Өзбекстан үшін нағыз мультфильмдей жарқын тарихи бет болары анық.
«Меҳмон» тобындағы келушілер бұл жарияланымға пікір қалдыра алмайды.
