Өзбекстан 2030 жылға қарай азаматтары визасыз бара алатын елдер санын 50-ге жеткізуді жоспарлап отыр. Бұл мақсат 2026–2030 жылдарға арналған жаңартылған даму стратегиясы жобасында белгіленген.
Құжатқа сәйкес, биыл тағы екі мемлекетпен визасыз немесе жеңілдетілген кіру бойынша келісімдерге қол жеткізу көзделген. 2027 жылы мұндай келісімдер саны беске жетуі тиіс.
Жоспарға сай, визасыз бағыттар саны 2028 жылы 45-ке, 2029 жылы 48-ге, 2030 жылы 50-ге жетеді деп күтілуде. Сонымен қатар, 2026–2030 жылдары электронды виза және әуежайда рәсімделетін виза сияқты жеңілдетілген тәртіптері бар елдер санын 60-қа жеткізу жоспарланған.
Бұдан бөлек, жақын жылдары консулдық қызметтерге арналған мобильді платформа іске қосылады. Цифрландыру есебінен пайдаланушылар санын қазіргі 8,5 мыңнан 2026 жылы 15 мыңға дейін, 2030 жылға қарай 100 мыңға дейін арттыру мақсат етілген.
СІМ мәліметінше, қазір Өзбекстан азаматтары 35 елге визасыз сапарлай алады. Тағы 42 мемлекет әртүрлі форматтағы жеңілдетілген кіру тәртіптерін ұсынады.
“Zamin”-ді Telegram-нан оқыңыз!
