Родриго: “Эль-Класико”да «Барселона»га қарши ўз сўзимизни айтамиз!

“Реал Мадрид”нинг тезкор вингери Родриго навбатдаги “Эль-Класико” олдидан мухлисларга ишонч улашди. Унинг айтишича, ўтган мавсумдаги хатолардан хулоса чиқарилган, эндиликда эса жамоа ўз уйида тўлиқ куч билан жавоб қайтаришга тайёр.

Бразилиялик футболчи ўтган мавсум ҳақида очиқча гапирди: “Ўша пайтни эслаш шарт эмас. Биз етарлича кучли эмасдик, айниқса ‘Эль-Класико’да. Тўрт марта мағлуб бўлдик — бу факт. Ҳозир ‘Барселона’ яхши ритмда, ишонч билан ўйнаяпти, лекин бизда ҳам ажойиб таркиб бор”.

Родриго учрашув сценарийси оғир кечишини тан олди, аммо “Сантьяго Бернабеу” фактори ҳал қилувчи бўлишини таъкидлади: “Бу қийин ўйин бўлади. Лекин ўзимизнинг майдон, ўз мухлисларимиз олдида майдонга тушамиз. Ғалаба учун аниқ режамиз бор, қандай бўлмасин ютишимиз шарт — чунки уйдамиз”.

У, шунингдек, шахсий мақсадини ҳам яширмади: “Қироллик клубига келган ҳар бир футболчи Чемпионлар лигасида соврин қўлга киритишни ва ‘Барселона’га ҳал қилувчи гол уришни орзу қилади. Мен ҳам шунга интиламан”.

Маълумот учун, жорий мавсумдаги дастлабки “Эль-Класико” 26 октябрь куни бўлиб ўтади. “Бернабеу”даги бўлаётган тўқнашув Родриго ва жамоадошлари учун ўтган мавсумдаги нохуш хотираларга муносиб нуқта қўйиш имконияти бўлади.