Сафонов баёнот берди, лекин қўл синиши ҳақида гапирмади

ПСЖ дарвозабони Матвей Сафонов қўли сингани ҳақида хабарлар тарқалганидан кейин мухлисларга мурожаат қилди. У Telegram каналларида эълон қилинган видеода ўзини қўллаб-қувватлаган барчага миннатдорлик билдирди.

Сафонов сўнгги икки кун ичида жуда кўп хабар келганини, ҳаммасига жавоб бериш қийинлигини айтиб, илиқ сўзлар учун раҳмат деди. Шунингдек, у ишлашда давом этишини таъкидлаб, “нима бўлишидан қатъи назар, мени синдириб бўлмайди”, дея қатъий фикр билдирди.

Аввалроқ Сафонов Қитъалараро кубок финалида ёрқин ўйин намойиш этиб, пенальтилар сериясида тўртта зарбани қайтарганди. Эътиборлиси, у мурожаатида олган жароҳати ҳақида бирор маълумот бермади.