«Лацио» бош мураббийи Сарри юрак муаммоси сабаб операция қилдирди
«Лацио» матбуот хизмати клуб бош мураббийи Маурицио Сарри юракдаги муаммолар туфайли жарроҳлик амалиётини бошдан кечирганини маълум қилди. Бу ҳақда euro-football.ru хабар беради.
66 ёшли мутахассисда бўлмачалар фибрилляцияси аниқланган — бу юрак уриш ритми бузилиши бўлиб, инсульт ёки тромблар пайдо бўлиши хавфини оширади. Сарри Tor Vergata клиникасида аритмияни даволашда қўлланадиган катетерли абляция амалиётидан ўтди. Операцияни профессор Андреа Натале амалга оширди ва у муваффақиятли якунланди. Яқин кунларда Сарри жамоа бошқарувига қайтиши кутилмоқда.
Маурицио Сарри «Лацио»ни жорий йилда қабул қилиб олган. У аввал ҳам римликларни 2021–2024 йилларда бошқарган. Мураббийлик фаолияти давомида Сарри икки совринга эга чиққан: 2019 йилда «Челси» билан Европа Лигаси ҳамда 2019/20 мавсумида «Ювентус» билан А Серия чемпионлиги.
