Джикиянинг агенти «Антальяспор»ни тарк этиши ҳақидаги гапларга изоҳ берди

«Антальяспор» ҳимоячиси Георгий Джикия бўйича тарқалган миш-мишларга футболчининг агенти Владимир Кузмичёв муносабат билдирди. Бу ҳақда euro-football.ru хабар беради.

Агентнинг айтишича, Джикия билан ҳаммаси жойида ва клуб унга ишонч билдирмоқда. Сўнгги учрашувларда у майдонга тушмагани сабаби эса микрожароҳат бўлган. Ҳозир эса тўлиқ тикланган ва кейинги ўйинда иштирок этиши кутилмоқда.

Эслатиб ўтамиз, аввалроқ матбуотда турк клуби «Спартак»нинг собиқ сардори билан хайрлашишни истаётгани ҳақида хабарлар чиққанди.

Джикиянинг Туркия чемпионатидаги жорий мавсум ҳисобида 12 та ўйин ва 2 та гол бор. Футболчининг «Антальяспор» билан шартномаси 2027 йил ўрталарича амал қилади.