Элдор Шомуродов Туркия чемпионатининг энг сермаҳсул футболчисига айланди
Ўзбекистон миллий жамоаси ва «Истанбул Башакшеҳир» ҳужумчиси Элдор Шомуродов Туркия Суперлигасида энг сермаҳсул ўйинчи сифатида пешқадамликни қўлга олди. Бу ҳақда euro-football.ru хабар беради.
21 февраль ҳолатига кўра, Шомуродов «гол+пас» тизимида 20 очко жамғарган: 16 та гол урган ва 4 та голли узатма берган. Шу натижа уни турнир тўпурарлари рўйхатининг биринчи поғонасига олиб чиқди.
«Галатасарай» юлдузлари билан таққослаганда ҳам Элдорнинг кўрсаткичлари юқорироқ: Мауро Икардининг барча ўйинларда 13 та голи бор, Виктор Осимҳен эса миллий чемпионат доирасида 9 марта рақиб дарвозасини ишғол қилган.
Эслатиб ўтамиз, Шомуродов тўп сураётган Ўзбекистон миллий жамоаси 2026 йил Шимолий Америкада ўтказиладиган жаҳон чемпионатига йўлланмани қўлга киритган.
