Элдор Шомуродов Туркия чемпионатининг энг сермаҳсул футболчисига айланди

Ўзбекистон терма жамоаси ҳужумчиси ва «Истанбул Башакшехир» футболчиси Элдор Шомуродов Туркия чемпионатида энг сермаҳсул ўйинчи сифатида етакчиликни қўлга олди. Бу ҳақда euro-football.ru хабар беради.

21-февраль ҳолатига кўра, Шомуродов «гол+пас» тизимида 20 очко жамғарди: 16 та гол ва 4 та голли узатма. У шу тариқа турнирнинг тўпурарлари рўйхатида ҳам биринчи ўринга чиқди.

«Галатасарай» юлдузлари билан таққослаганда, Шомуродовнинг кўрсаткичлари анча юқори. Мауро Икардининг барча ўйинларда 13 та голи бор, Виктор Осимҳен эса миллий чемпионат доирасида 9 та гол билан кифояланган.

Эслатиб ўтамиз, Шомуродов етакчилик қилаётган Ўзбекистон терма жамоаси 2026-йили Шимолий Америкада ўтадиган жаҳон чемпионатига йўлланмани қўлга киритган.