"Барселона" ҳакамликдан норози бўлиб УЕФАга шикоят тайёрламоқда...
Европа Чемпионлар Лигаси чоракфинал босқичи доирасида «Барселона» ва «Атлетико» ўртасидаги учрашувдан кейин катта муҳокамалар юзага келди. Каталония клуби 0:2 ҳисобидаги мағлубиятдан сўнг ҳакамнинг қарорларидан қаттиқ норози бўлиб, УЕФАга расмий шикоят киритиш имкониятини кўриб чиқмоқда.
Асосий эътирозли вазиятлардан бири 54-дақиқада содир бўлган. Унда «Атлетико» ҳимоячиси Марк Пубиль жарима майдонида тўпни қўли билан тўхтатганига қарамасдан, бош ҳакам Иштван Ковач пенальти белгиламади. ВАР тизими учун масъул бўлган Кристиан Дингерт ҳам ушбу эпизодга аралашмагани каталонияликлар норозилигини янада кучайтирди.
Шунингдек, «Барселона» жамоаси Пау Кубарсининг майдондан четлатилиши бўйича ҳам қарорни адолатсиз деб ҳисобламоқда. Футболчи аввалига сариқ карточка олган бўлса, кейинчалик ВАР аралашувидан сўнг қизил карточка билан майдондан чиқарилган. Клуб раҳбарияти ВАР қайси ҳолатларда аралашиши ёки аралашмаслиги борасида аниқлик йўқлигини таъкидламоқда.
Бундан ташқари, каталонияликлар фикрича, «Атлетико» ярим ҳимоячиси Коке биринчи бўлимнинг ўзидаёқ қизил карточка олиб майдонни тарк этиши керак эди.
Манбаларга кўра, айнан шу баҳсли ҳолатлар «Барселона» раҳбариятини УЕФАга расмий шикоят юбориш масаласини жиддий кўриб чиқишга олиб келган.
Шу билан бирга, Diaro Sport нашри маълумотига кўра, бош ҳакам Иштван Ковач Европа Чемпионлар Лигасининг қолган ўйинларига тайинланмаслиги эҳтимол қилинмоқда.
Маълумот учун, жавоб учрашуви 14 апрель куни Мадрид шаҳрида бўлиб ўтади.
