Роналду ва Феликснинг голлари “Ан Наср”га муҳим ғалаба келтирди

Саудия Пролигасининг 28-турида “Ан Наср” меҳмон сифатида “Ал Оҳдуд”га қарши майдонга тушиб, ишончли ўйин намойиш этди. Риёд клуби учрашувни 2:0 ҳисобида ўз фойдасига ҳал қилиб, муҳим уч очкога эга бўлди.

Ўйинда ҳисобни дастлаб жамоа юлдузи Криштиану Роналду очди. У учрашувнинг 15-дақиқасида ўз фаолиятидаги 968-голини киритиб, яна бир тарихий натижага эришди. Иккинчи бўлим бошида эса Жоау Феликс ҳисобни икки баробарга ошириб, ғалабани мустаҳкамлади.

Учрашув давомида “Ан Наср” устунликни қўлга олиб, рақибга катта имконият қолдирмади. Ҳимоя ва ҳужум чизиғидаги барқарор ўйин Риёд клубига тўлиқ назоратни сақлаш имконини берди.

Саудия Пролигаси. 28-тур
“Ал Оҳдуд” – “Ан Наср” 0:2
Голлар: Роналду 15’, Феликс 47’

“Ан Наср” таркиби: Бенто, Бушал, Симакан, Амри, Айман, Брозович, Анжело (Ғариб, 82), Коман (Ал Ҳайбари, 67), Мане, Феликс, Роналду (Ал Ҳамдан, 82).

Шу натижадан сўнг “Ан Наср” очколари сонини 73 тага етказиб, чемпионлик пойгасида босимни кучайтирди. Жадвалда “Ал Ҳилол” 68 очко билан иккинчи, “Ал Аҳли” эса 66 очко билан учинчи ўринда бормоқда.