Лотҳар Маттҳаус: Бавария Жоско Гвардиолни трансфер қилиши мумкин
2023-йилда 90 миллион евро эвазига РБ Лейпцигдан Манчестер Сити сафига ўтган Жоско Гвардиол тез орада Бундеслигага қайтиши мумкин. Германия футболи афсонаси Лотҳар Маттҳауснинг сўзларига кўра, Бавария клуби хорватиялик ҳимоячини ўз сафига қўшиб олиш бўйича дастлабки қадамларни ташлаган. Бу ҳақда Goal.com хабар беради.
Маттҳаус Sky телеканалига берган интервюсида Бавария раҳбарияти Манчестер Ситида тўп сураётган собиқ Лейпциг футболчиси билан қизиқаётганини маълум қилди. Мутахассиснинг фикрича, Гвардиолнинг чап оёқда ўйнай олиши ва ҳимоянинг бир неча позициясида ҳаракат қила олиши Мюнхен клуби учун катта устунлик ҳисобланади.
Айни дамда Бавария марказий ҳимоясида Жонатҳан Таҳ ва Дайо Упамекано асосий таркиб вакиллари ҳисобланади. Агар Мин-жае Ким жамоани тарк этадиган бўлса, Гвардиол учун бўш жой пайдо бўлиши мумкин. Бироқ, 2028-йилга қадар шартномаси бор футболчининг трансфери Бавария учун жуда қимматга тушиши аниқ.
Гвардиол 2021–2023-йиллар оралиғида РБ Лейпциг сафида 87 та ўйинда майдонга тушиб, ўзини кўрсатган эди. Манчестер Сити таркибида ҳам асосий ўйинчи мақомига эга бўлган хорватиялик футболчи жароҳатлар сабабли мавсумнинг бир қисмини ўтказиб юборган бўлса-да, ҳозирда яна ўйин амалиётига қайтган.
