UFC 327 турнири: Прохазкани нокаут қилган Ульберг янги чемпион бўлди

АҚШнинг Майами шаҳрида ўтказилган “UFC 327” турнири ўз якунига етди. Кечанинг энг асосий жангида чехиялик Иржи Прохазка ҳамда Янги Зеландия жангчиси Карлос Ульберг ярим оғир вазн бўйича чемпионлик камари учун октагонга кўтарилди. Ульберг биринчи раунднинг ўзида нокаут қайд этиб, янги чемпионга айланди.

Прелим кард натижалари

Кечанинг дастлабки жангларида бир қатор қизиқарли тўқнашувлар қайд этилди. Чарльз Радтке Франсиско Прадони 30–27 ҳисобидаги бир овоздан устунлик билан таслим этди. Висенте Люке эса биринчи раунддаёқ Келвин Гастелумни сабмишн орқали мағлуб этди.

Крис Падилья очколар ҳисобига Маркель Медерос устидан ғалаба қозонди. Татьяна Суарес иккинчи раундда Лупи Годинесни бўғиш усули билан енгди. Матеуш Гамрот ҳам иккинчи раундда Эстебан Рибовични сабмишн орқали таслим қилди.

Кевин Холланд ҳакамларнинг якдил қарори билан Рэнди Браунни мағлуб этди. Кечанинг яна бир кутилмаган натижаси — Аарон Пико Патрисио Питбулни очколар бўйича енгиши бўлди.

Асосий кард натижалари

Асосий жангларда ҳам кескин тўқнашувлар кузатилди. Каб Суонсон биринчи раундда Нэйт Ландверни нокаут қилди. Доминик Рейес ҳакамлар қарори билан Жонни Уокерни мағлуб этди.

Жош Хокит эса Кёртис Блэйдс устидан якдил қарор билан ғалаба қозонди. Пауло Коста 3-раундда Азамат Мурзакановни нокаутга учратди.

Кечанинг финал жангида Карлос Ульберг Иржи Прохазкани биринчи раунддаёқ нокаут қилиб, ярим оғир вазннинг янги чемпиони сифатида тарихга кирди.