Мбаппе Моуринионинг «Реал Мадрид»га қайтишига шама қилди
Франциялик ҳужумчи Килиан Мбаппе ижтимоий тармоқлардаги ҳаракати билан Жозе Моуринионинг «Реал Мадрид»га қайтиши ҳақидаги миш-мишларни авж олдирди. Ҳужумчи португалиялик мутахассиснинг Мадрид клубига қайтиши мумкинлиги ҳақидаги постга лайк босган. Ҳозирда «Бенфика»ни бошқараётган Моуринионинг номзоди Алваро Арбелоанинг ўрнига асосий даъвогар сифатида кўрилмоқда. Бу ҳақда Goal.com xabar беради.
Испания пойтахтида жамоанинг келажаги ва янги мураббий масаласи асосий мавзуга айланган. «Реал Мадрид» жорий мавсумни совринсиз якунлаш хавфи остида турибди, бу эса амалдаги раҳбариятга бўлган босимни оширмоқда. Мбаппе лайк босган суратда Моуринионинг аввалги ютуқлари ва у ҳозирги юлдузлар билан қандай муваффақиятга эришиши мумкинлиги тасвирланган.
Моуринио 2010-2013 йиллар давомида Мадридда ишлаган ва «Барселона»нинг гегемонлигига чек қўйган эди. Ўшанда жамоа 100 очко билан рекорд ўрнатган, Криштиану Роналду эса ўз фаолиятидаги энг сермаҳсул даврни ўтказган эди. Мбаппенинг ушбу статистикага қизиқиш билдириши унинг янги тактик интизомга тайёрлигидан далолат бериши мумкин.
Амалдаги мураббий Алваро Арбелоа эса танқидларга қарамай, ўз позициясини ҳимоя қилмоқда. У жамоада инқилоб қилиш шарт эмаслигини таъкидлаган бўлса-да, клуб президенти Флорентино Перец 2026-27 йилги мавсум учун янги номзодларни кўриб чиқмоқда. Мбаппенинг ҳаракати эса Арбелоанинг клубдаги келажагини янада сўроқ остида қолдирди.
Ҳозирда «Реал Мадрид» Испания чемпионатида «Барселона»дан 9 очко ортда қолмоқда ва Чемпионлар лигасидан чиқиб кетган. Мавсумнинг сўнгги ойи Арбелоа учун жиддий синов бўлади. Агар натижалар яхшиланмаса, Моуринионинг «Сантьяго Бернабеу»га қайтиши ҳақиқатга айланиши мумкин.
