Бавария президенти Винсент Компани ҳақида: У сотилмайди
Бавария президенти Ҳерберт Ҳаинер жамоа бош мураббийи Винсент Компани атрофидаги миш-мишларга чек қўйди. Манчестер Сити билан боғланган хабарларга қарамай, клуб раҳбари белгиялик мутахассисни «сотилмайдиган» деб атади ва унинг Аллианз Аренадаги фаолиятини юқори баҳолади. Бу ҳақда Goal.com хабар беради.
Пеп Гуардиоланинг Этиҳад Стадиумдаги келажаги ноаниқ бўлиб турган бир пайтда, Компани унинг ўрингбосари сифатида кўрилаётган эди. Бироқ Мюнхен клуби ўз мураббийини қўйиб юбормоқчи эмас. Ҳаинернинг таъкидлашича, Компани билан 2029-йилгача имзоланган шартнома клуб учун хотиржамлик беради.
«Бошқа клублар эшик қоқиши мумкин, лекин Винсент сотилмайди. Унинг учун ҳеч қандай трансфер нархи белгиланмаган. У эрталаб Сабенер Страссе базасига биринчи бўлиб келади ва энг охирги бўлиб кетади. Ҳатто сафар ўйинларидан қайтаётганда ҳам самолётда ўйин таҳлили билан банд бўлётганини кўриш мумкин», деди Ҳаинер Sport Bild нашрига берган интервюсида.
Президентнинг сўзларига кўра, шартномани узайтиришдан мақсад Манчестер Сити қизиқишидан ҳимояланиш эмас, балки мураббийнинг ажойиб ишини муносиб тақдирлаш бўлган. Компани жамоага ҳужумкор услуб ва барқарорлик олиб келди, бу эса клубнинг узоқ муддатли режалари учун жуда муҳим ҳисобланади.
Ҳозирда Винсент Компани ва унинг оиласи Мюнхенда бахтли экани айтилмоқда. Бавария раҳбарияти унинг меҳнатсеварлиги нафақат жамоага, балки бутун клуб атмосферасига ижобий таъсир кўрсатаётганини алоҳида эътироф этди.
