Марк Бернал Ханси Фликдан миннатдор ва Испания термасидан чақирув кутмоқда
Барселона жамоасининг ёш иқтидори Марк Бернал оғир жароҳатдан сўнг ўз спорт формасини тиклашда ёрдам берган мураббий Ханси Фликга чексиз миннатдорчилик билдирди. 18 ёшли ярим ҳимоячи ўзининг Ла Лига юлдузига айланишида германиялик мутахассиснинг ўрни беқиёс эканини таъкидлаб, унга ўз ҳаётидан қарздор эканини айтди. Бу ҳақда Goal.com хабар беради.
Бернал ўтган мавсумда тиззасидан олган жиддий жароҳатини енгиб ўтиб, Барселона сафида 21 та ўйинда майдонга тушди ва учта голда иштирок этди. Феврал ойидан бошлаб Френкие де Жонгнинг йўқлигида асосий таркибдан мустаҳкам жой олган ўсмир футболчи, эндиликда Испания терма жамоасининг асосий таркибига чақирилишидан умидвор.
Каталония радиосига берган интервюсида футболчи ёзги таътил учун режалар тузмаётганини маълум қилди. "Албатта, терма жамоада ўйнашни хоҳлайман, бу ҳар бир футболчи учун энг олий мақсад. Ҳозирча ёз учун ҳеч қандай режа қилганим йўқ, душанба кунги расмий эълонни кутяпман", — деди Марк Бернал.
Шунингдек, ярим ҳимоячи жамоани тарк этиши кутилаётган Роберт Левандовски ҳақида ҳам тўхталиб ўтди. У полшалик ҳужумчини клуб афсонаси деб атаб, кетма-кет қўлга киритилган чемпионликларда унинг ҳиссаси катта бўлганини эътироф этди. Бернал Чемпионлар лигаси чорак финалида Атлетико Мадрид жамоасидан учралган мағлубиятдан сўнг, келаси мавсумда янада катта ғалабаларни кўзлаётганини билдирди.
Испания терма жамоаси бош мураббийи Луис де ла Фуенте душанба куни Жаҳон чемпионати учун якуний таркибни эълон қилади. Агар Бернал рўйхатга киритилса, у "Ла Роха" билан биргаликда 2010-йилдаги муваффақиятни такрорлашга ҳаракат қилади. Испанлар гуруҳ босқичида Кабо-Верде, Саудия Арабистони ва Уругвай терма жамоаларига қарши баҳс олиб борадилар.
