Россияда керамика асослари учун 300 миллион рубллик қурилма яратилади
Россия Саноат ва савдо вазирлиги замонавий микроэлектроника учун муҳим ҳисобланган керамика лентасини ишлаб чиқарувчи маҳаллий қурилмани яратиш бўйича тендер эълон қилди. Лойиҳа учун 284,1 миллион рубл ажратилган бўлиб, у электроника саноатидаги импорт ўрнини босиш дастурининг бир қисмига айланиши кутилмоқда. Янги тизим Европа технологиялари, хусусан, Словениянинг Кеко Эқуипмент компанияси томонидан ишлаб чиқарилган ЭКО КАМ-К35 тизими ўрнини эгаллаши керак. Бу ҳақда Ixbt.com хабар беради.
Гап лентали қуйиш технологияси ҳақида бормоқда. Бунда махсус керамика суспензиясидан юпқа ишлов берилмаган лента шакллантирилади ва кейинчалик қуритилади. Бундай материаллар микросхема корпуслари, керамика асослари ва кўп қатламли электрон компонентлар ишлаб чиқаришда кенг қўлланилади. Бўлажак қурилма лентанинг қалинлиги, зичлиги ва кенглиги каби параметрларни юқори аниқликда назорат қилиши лозим.
Лойиҳа юқори даражадаги автоматлаштиришни кўзда тутади. Тизим технологик рецептларни сақлаш, оператор ва муҳандислар учун кириш ҳуқуқларини чеклаш ҳамда параметрлар меъёрдан четга чиққанда жараённи автоматик тўхтатиш функцияларига эга бўлади. Ишлаб чиқиш жараёни бир неча босқичда амалга оширилади: 2028-йилнинг мартигача прототип яратилади, октябрь ойига келиб эса якуний синовлар ўтказилади.
Асосий талаблардан бири — ишлаб чиқаришни максимал даражада маҳаллийлаштиришдир. Қурилманинг иситиш, кесиш ва назорат қилиш каби муҳим қисмлари Россияда ишлаб чиқарилган бўлиши шарт. Техник шартларга кўра, ускунанинг хизмат қилиш муддати камида 10 йилни, носозликларсиз ишлаш вақти эса камида 1000 соатни ташкил этиши белгиланган.
