Пеп Гуардиола агенти Ал-Насср билан алоқалар ҳақида маълумот берди
Манчестер Сити бош мураббийи Пеп Гуардиола жорий мавсум якунида клубни тарк этишини расман эълон қилганидан сўнг, Саудия Арабистонининг Ал-Насср клуби мутахассисга қизиқиш билдира бошлади. Саудия Pro-лигаси чемпионлари дунёнинг энг кучли мураббийи ва Криштиано Роналдо ўртасида тарихий ҳамкорликни йўлга қўйишни мақсад қилган. Бу ҳақда Goal.com хабар беради.
Гуардиола Манчестер Сити сафидаги 10 йиллик муваффақиятли фаолиятини якунлашини эълон қилиши ортидан, Ал-Насср раҳбарияти уни Ар-Риёдга жалб қилиш учун ҳаракатга тушди. Саудия чемпиони ва ОФК Чемпионлар лигаси 2 ғолиби бўлган Жорге Жесус жамоани тарк этгач, клуб янги мураббий излашга киришган. Хабарларга кўра, клуб мураббийга йилига 130 миллион еврога яқин рекорд даражадаги маош таклиф қилган.
Пеп Гуардиола агенти Хосеп Мариа Оробитг ушбу миш-мишларга ойдинлик киритди. У Саудия нашрларига берган интервюсида: "Бир ярим ой олдин алоқа бўлган эди, лекин бу шунчаки мулоқот бўлиб, ҳеч қандай ёзма таклиф ёки мажбурият йўқ. Шунингдек, айтилганидек катта пуллар ҳақида гап кетмаган", — деб таъкидлади.
Агентнинг сўзларига кўра, нафақат Ал-Насср, балки Саудия Арабистони футбол федерацияси ҳам мураббий билан боғланган. Бироқ, ҳозирча томонлар ўртасида келишув эҳтимоли жуда паст. Оробитг ҳозирги босқичда ҳеч бир томон Гуардиола билан шартнома имзолаш учун реал имкониятга эга эмаслигини қўшимча қилди.
Пеп Гуардиола Манчестер Сити бошқарувидаги сўнгги ўйинини якшанба куни Астон Вилла жамоасига қарши ўтказади. Шундан сўнг, у Ситй Футбол Груп тизимида глобал элчи сифатида ўз фаолиятини давом эттириши кутилмоқда.
