Ўзбекистонда бола туғилганда бериладиган “суюнчи пули”ни тўлаш тартибига ўзгартириш киритилди
Ўзбекистонда бола туғилганда бериладиган бир марталик “суюнчи пули”ни тўлаш тартибига ўзгартириш киритилди. Эндиликда биринчи фарзанди нобуд бўлган оилалар ҳам кейинги тирик туғилган фарзанди учун ушбу нафақани олиши мумкин бўлади.
Аввалги тартибга кўра, “суюнчи пули” фақат биринчи фарзанд учун берилар эди. Агар илк фарзанд перинатал ёки эрта неонатал даврда вафот этса, кейинги бола иккинчи фарзанд сифатида баҳоланиб, нафақа рад этилган.
Президент Халқ қабулхонасига келиб тушган мурожаатлардан сўнг Вазирлар Маҳкамаси қарорига тегишли ўзгартиришлар киритилди. Янги тартибга кўра, биринчи ёки ундан кейинги фарзандлар нобуд бўлган тақдирда ҳам навбатдаги тирик туғилган бола учун “суюнчи пули” тўланади.
Ҳозирда бола туғилганда бериладиган бир марталик нафақа миқдори тахминан 890 минг сўмни ташкил этади.
