Селфи олишга уринган талаба қоя устидан қулаб ҳалок бўлди
Россиянинг Иркутск вилоятида юз берган фожеали ҳодиса тафсилотлари маълум қилинди. Маълумотларга кўра, 24 ёшли талаба қиз қоя устида суратга тушмоқчи бўлган пайтда йиқилиб ҳалокатга учраган.
Аввалроқ ижтимоий тармоқларда ушбу воқеа 2026 йил 24 май куни Холмушчино қишлоғи яқинидаги оқ қоялар ҳудудида содир бўлгани ҳақида хабарлар тарқалган эди. Қиз баланд қояга чиқиб, чиройли манзара фонида селфи олишга ҳаракат қилган.
Бироқ у турган жойдаги тупроқ кутилмаганда ўпирилиб кетган ва натижада талаба қарийб 100 метр баландликдан пастга қулаб тушган. Ҳодиса жойига етиб келганлар жабрланувчини зудлик билан олиб чиқиб, тез тиббий ёрдам машинасига жойлаштирган.
Афсуски, шифохонага олиб кетилаётган вақтида қиз ҳаётдан кўз юмган. Ҳозирда мазкур фожеа юзасидан тегишли органлар томонидан текширув ишлари олиб борилмоқда, ҳодисанинг аниқ сабаблари ўрганилмоқда.
Мутахассислар ёз мавсумида тоғли ҳудудларга ташриф буюрувчилар сони ошишини инобатга олиб, дам олувчилардан эҳтиёткорликни кучайтиришни, хавфли жойларда суратга тушишдан тийилишни тавсия қилмоқда.
