Бавария учун кутилмаган зарба: Антонй Гордон бошқа клуб билан келишиб олди
Испаниянинг Mundo Deportivo нашри хабарига кўра, Барселона жамоаси Нюкасл ҳужумчиси Антонй Гордонни ўз сафига қўшиб олиш борасида асосий даъвогарга айланди. Маълумотларга кўра, каталонияликлар Англия терма жамоаси аъзоси учун курашда пешқадамликни қўлга киритган. Италиялик трансфер эксперти Fabrizio Romano ҳам футболчи ва клуб ўртасида келишувга эришилганини тасдиқламоқда. Бу ҳақда Goal.com хабар беради.
Натижада, 25 ёшли футболчи учун кураш олиб бораётган яна икки гигант — Бавария ва Ливерпул қуруқ қолиши кутилмоқда. Антонй Гордон фаолиятини Испанияда давом эттиришни афзал кўрмоқда. Унга мураббий Ханси Флик, спорт директори Деко ва президент Жоан Лапорта томонидан тақдим этилган спорт лойиҳаси маъқул келган.
Барселона раҳбариятининг яқинда Лондонга амалга оширган сафари ҳал қилувчи аҳамиятга эга бўлди. Деко бошчилигидаги делегация Англия пойтахтида футболчи билан учрашиб, уни ўз томонига оғдиришга муваффақ бўлган. Хабарларга кўра, инглиз ҳужумчисининг асосий мақсади Камп Ноу стадионида тўп суриш ҳисобланади.
Ҳозирда Нюкасл ва Барселона ўртасида трансферни якунлаш бўйича расмий музокаралар давом этмоқда. Каталонияликлар рақибларини ортда қолдириш учун тезкор ҳаракат қилишмоқда. Бавария бир неча ҳафта олдин футболчига қизиқиш билдирган бўлса, Ливерпул сўнгги кунларда ҳужумни кучайтириш мақсадида унга жиддий таклиф билан чиққан эди.
Ливерпул Муҳаммад Салах кетиши кутилаётган бир пайтда ҳужум чизиғини янгилашни мақсад қилган эди. Бироқ, уларнинг барча уринишлари бесамар кетганга ўхшайди, чунки футболчи аллақачон Барселона фойдасига танлов қилиб бўлган.
