xAI миллиардлаб зарар кўрмоқда: Маскнинг амбициялари ва реал даромадлар
Илон Маск томонидан 2023-йил охирида асос солинган xAI компанияси ўтган йил давомида 6 миллиард доллардан ортиқ операцион зарар кўрди. SpaceX компаниясининг ИПО жараёнига тайёргарлик доирасида эълон қилинган молиявий ҳисоботлар шуни кўрсатадики, компаниянинг йиллик даромади харажатларга нисбатан анча камтарона кўринишга эга. 2025-йил учун xAI умумий даромади тахминан 3,2 миллиард долларни ташкил этган. Бу ҳақда Ixbt.com хабар беради.
Эътиборли жиҳати шундаки, ушбу даромаднинг асосий қисми сунъий интеллект маҳсулотларидан эмас, балки Х (собиқ Twitter) платформаси билан интеграциядан келган. Х платформасининг реклама тушумлари 1,8 миллиард долларни ташкил этган бўлса, Grok чатботи орқали келган даромад тахминан 270 миллион долларга баҳоланмоқда. Таққослаш учун, OpenAI йиллик даромади 24 миллиард долларга, Anthropic эса 30 миллиард долларга етганини маълум қилган.
Компания харажатларининг катта қисми тадқиқот ва ишланмаларга, хусусан, NVIDIA график процессорларини сотиб олишга йўналтирилган. 2025-йилда бу мақсадлар учун 5 миллиард доллардан ортиқ маблағ сарфланди. Илон Маск Колоссус деб номланган иккита суперкомпьютер яратилишини эълон қилган бўлса-да, ҳозирда ушбу инфратузилманинг бир қисми Anthropic компаниясига ижарага берилмоқда.
Молиявий қийинчиликлардан ташқари, xAI кадрлар масаласида ҳам муаммоларга дуч келмоқда. Сўнгги ойларда бир неча асосчилар ва муҳим ходимлар жамоани тарк этишди. Маскнинг таъкидлашича, компания бошидан нотўғри қурилган ва ҳозирда у нолдан қайта ташкил этилмоқда. Эндиликда асосий эътибор сунъий интеллект ёрдамида дастурлаш воситаларини ишлаб чиқишга қаратилмоқда.
