Ўзбекистон рекорд ўрнатди: 12 мингдан ортиқ сомса тайёрланди (видео)
Ўзбекистон яна бир бор Гиннес рекордлар китобидан жой олди. Бу сафар мамлакатимиз энг кўп тайёрланган сомса сони бўйича янги рекорд ўрнатди. Аввалроқ эса лаваш тайёрлаш бўйича ҳам рекорд қайд этилгани юртимиз гастрономик салоҳияти нақадар юқори эканини яна бир бор исботлайди.
Маълумотларга кўра, умумий ҳисобда 12 634 дона сомса тайёрланиб, рекорд натижага эришилди. Ушбу улкан жараёнда қарийб 50 нафар ошпаз иштирок этиб, сомса тайёрлаш ишларини амалга оширди. Уларни ёпиш учун эса бир вақтнинг ўзида 44 та тандирдан фойдаланилди.
Албатта, рекорд ўрнатиш осон кечмади. Ҳар бир сомса алоҳида қўл меҳнати билан тугилиб, битталаб тандирларга ёпилди. Бу эса катта сабр, аниқлик ва жамоавий ҳамкорликни талаб қилди.
Узоқ ва машаққатли меҳнатдан сўнг натижа ўз самарасини берди — рекорд расман қайд этилди. Ушбу ютуқ нафақат иштирокчилар, балки бутун Ўзбекистон учун фахрга айланди.
Рекорд ортидан эса байрамона кайфият ҳукм сурди. Иштирокчилар ва томошабинлар ушбу муваффақиятни қувонч билан нишонлаб, кулгу ва хурсандчиликка бой лаҳзаларни бошдан кечиришди.
