NVIDIA рақиби: Хитойда янги Т-Ҳеад Женву М890 процессори тақдим этилди
Алибаба компанияси сунъий интеллект учун мўлжалланган янги Женву М890 чипини намойиш этди. Хитой технология гиганти АҚШнинг экспорт чекловлари кучайиб бораётган бир пайтда, NVIDIA чипларига муносиб маҳаллий муқобил яратиш борасидаги ҳаракатларини жадаллаштирмоқда. Бу ҳақда Ixbt.com хабар беради.
Алибаба таркибидаги яримўтказгичлар ишлаб чиқарувчи Т-Ҳеад бўлинмаси томонидан яратилган ушбу чип ўзидан олдинги Женву 810E моделига қараганда уч баравар юқори унумдорликни таъминлайди. У махсус сунъий интеллект "агентлари" — инсон аралашувисиз мураккаб ва кўп босқичли вазифаларни бажаришга қодир дастурий тизимлар учун ишлаб чиқилган.
Компания баёнотига кўра, янги процессор катта ҳажмдаги хотира ва коммуникация юкламаларини қайта ишлаш учун жуда мос келади. Бу, айниқса, моделларнинг узоқ муддатли контекстни сақлаб қолиши ва реал вақт режимида ҳаракатларни мувофиқлаштириши керак бўлган агентлик тизимларида муҳим аҳамиятга эга.
Шунингдек, Алибаба чипларни ривожлантиришнинг кўп йиллик режасини ҳам эълон қилди. Унга кўра, М890 моделидан сўнг 2027-йилнинг учинчи чорагида В900, 2028-йилда эса Ж900 чиплари чиқарилади. Кутилишича, В900 модели М890 га нисбатан унумдорликни яна уч бараварга оширади.
