Airbnb меҳмонхоналар бозорига кирди ва сунъий интеллект имкониятларини кенгайтирди
Airbnb ўзининг асосий бизнес моделини ўзгартириб, платформага меҳмонхоналарни қўшишни бошлади. Эндиликда фойдаланувчилар нафақат хусусий хонадонлар, балки бутик-отелларни ҳам илова орқали банд қилишлари мумкин. Компания бир неча ойлик синовлардан сўнг, Нью-Йорк, Париж, Лондон, Мадрид, Рим ва Сингапур каби 20 та йирик шаҳардаги меҳмонхоналар билан ҳамкорликни расман йўлга қўйди. Бу ҳақда Techcrunch.com хабар беради.
Иловада меҳмонхоналарни қидириш учун махсус фильтр пайдо бўлди. Агар фойдаланувчи бир ёки икки кечага жой қидирса, тизим автоматик равишда меҳмонхоналарни таклиф қилади. Airbnb маркетинг бўйича вице-президенти Жуд Копланнинг сўзларига кўра, бу янгилик сўнгги дақиқадаги бандловлар ва хизмат сафарлари учун жуда қулайдир. Шунингдек, компания нархлар бўйича кафолат бериб, бошқа жойда арзонроқ нарх топилса, фарқни кешбэк кўринишида қайтаришни вада қилмоқда.
Airbnb фақат турар жой билан чекланиб қолмоқчи эмас. Компания ўз хизматлари доирасини кенгайтириб, юкларни сақлаш, автомобиллар ижараси ва маҳаллий гидлар ҳамроҳлигидаги экскурсияларни ҳам қўшмоқда. Бу орқали платформа Виатор ва ГетЁурГуиде каби рақобатчилар билан курашишни мақсад қилган. Ёзги мавсумда 15 000 дан ортиқ нуқтада юк сақлаш хизмати ва янги ижара тизими ишга туширилиши кутилмоқда.
Технологик жиҳатдан Airbnb сунъий интеллектдан фойдаланишни давом эттирмоқда, бироқ бошқа сайёҳлик компанияларидан фарқли ўлароқ, чатботлардан воз кечган. Компания раҳбари Бриан Ческйнинг фикрича, чатбот интерфейси саёҳатларни режалаштириш учун энг яхши ечим эмас. Бунинг ўрнига, AI мезбонларни рўйхатдан ўтказиш ва мижозларни қўллаб-қувватлаш тизимларини такомиллаштиришга йўналтирилади.
