Microsoft углеродни йўқотиш режаларини тўхтатмаганини маълум қилди
Microsoft компанияси БиоСирк стартапидан 650 000 метрик тонна углеродни йўқотиш кредитларини сотиб олишини эълон қилди. Гарчи бу битим ҳажми жиҳатидан унчалик катта бўлмаса-да, у соҳа учун муҳим аҳамиятга эга. Ўтган ойда ОАВда технология гиганти углеродни йўқотиш бўйича янги шартномаларни тўхтатгани ҳақида хабарлар тарқалган эди, бироқ янги келишув бу миш-мишларни рад этди. Бу ҳақда Techcrunch.com хабар беради.
БиоСирк вакиллари TechCrunch нашрига берган интервюсида шартнома май ойида имзоланганини тасдиқлади. Microsoft углеродни йўқотиш кредитлари бозорининг 90 фоиздан ортиғини назорат қилади, шунинг учун компаниянинг ҳар бир қарори ушбу соҳадаги ёш стартапларнинг яшаб қолишини белгилайди. Компаниянинг барқарор ривожланиш бўйича директори Мелание Накагава дастур тўхтатилмагани, балки мақсадларга эришиш учун стратегия қайта кўриб чиқилаётганини таъкидлади.
Янги лойиҳа доирасида БиоСирк бешта биогаз заводидан фойдаланади. Ушбу корхоналар қишлоқ хўжалиги чиқиндиларини саноат биореакторларида қайта ишлаб, метан ва карбонат ангидрид ҳосил қилади. Ҳосил бўлган карбонат ангидрид ушланиб, денгиз тубидаги ерости омборларида сақланади. Metaн эса электр энергияси ишлаб чиқариш учун ёқилади.
Microsoft компаниясининг AI (сунъий интеллект) соҳасидаги фаоллиги унинг экологик мақсадларига эришишини қийинлаштирмоқда. Маълумотлар марказларини қувват билан таъминлаш учун компания Техасда Чеврон билан ҳамкорликда табиий газда ишлайдиган йирик электр станциясини қурмоқда. Бу лойиҳадан чиқадиган зарарли газлар БиоСирк билан тузилган битим орқали камайтириладиган миқдордан анча кўп бўлиши кутилмоқда.
Компания 2030-йилга бориб "углерод-негатив" мақомига эришишни режалаштирган. Бунинг учун Microsoft атмосферага чиқарадиган газларидан кўра кўпроқ миқдордаги углеродни йўқ қилиши керак. AI технологиялари туфайли энергия истеъмоли ортиб бораётган бир пайтда, компания углеродни йўқотиш бўйича харидлар ҳажмини янада ошириши талаб этилади.
