Google фойдаланувчиларга сунъий интеллект ёрдамида ўз клонини яратишга рухсат берди
Google Лабс бўлинмасининг маҳсулотлар бўйича вице-президенти Элиас Роман йиллик Google И/О конференциясида Флов сервиси учун янги “аватар” функциясини намойиш этди. Флов — фойдаланувчиларга сунъий интеллект ёрдамида видео ва тасвирлар яратиш ҳамда уларни таҳрирлаш имконини берувчи воситадир. Эндиликда контент яратувчилар ўз ташқи кўринишини сканерлаб, аниқ рақамли клонини яратишлари ва уни исталган генерация қилинаётган видеоклипга жойлаштиришлари мумкин. Бу ҳақда Ixbt.com хабар беради.
Элиас Романнинг сўзларига кўра, ушбу функция кадрда кўринишни хоҳлайдиган, аммо реал суратга олиш жараёнларига вақт сарфлашни истамайдиган муаллифлар учун ишлаб чиқилган. Бундай рақамли нусхалар нафақат Флов ичида, балки Gemini экотизими ва YouTube платформасида ҳам фойдаланиш учун очиқ бўлади. Янгиланган сервиснинг асосий техник двигатели сифатида Вео нейротармоғи ўрнини эгаллаган янги Омни Флаш модели хизмат қилмоқда. У кадрларни бой деталлар билан тўйинтиради ва персонажларнинг юз тузилиши бузилиб кетиши билан боғлиқ муаммоларни бартараф этади.
Шахсий аватарни яратиш жараёни жуда оддий: фойдаланувчи смартфон орқали QR-кодни сканерлайди ва тизим сўровига кўра рақамлар кетма-кетлигини овоз чиқариб айтиб, бошини турли томонга буради. Google бу борада қатъий чеклов ўрнатган — фақат ўзининг рақамли нусхасини яратиш мумкин, бошқа шахсларнинг қиёфасидан фойдаланиш тақиқланади. Шунингдек, барча бундай видеоларга СйнтҳИД кўринмас рақамли сув белгиси туширилади.
Ушбу технология Meta компаниясининг Instagram Реэлс учун ишлаб чиққан ечимларига ўхшаб кетади, бироқ Google уни кенгроқ ижодий эркинлик билан тақдим этмоқда. Контент яратувчилар учун бу ишлаб чиқариш жараёнини максимал даражада соддалаштиришни англатса-да, аудитория орасида бундай “сохта” контентнинг кўпайиши борасида турли баҳслар юзага келиши кутилмоқда.
